ຫົວໜ້າກົມປະຊາສໍາພັນໄທ ພ້ອມຄະນະ 6ທ່ານ ເຂົ້າພົບທູດລາວ ເພື່ອຂໍໂທດເປັນທາງການ ເລື່ອງນຳສະເໜີຂ່າວຂາດຂໍ້ມູນຄວາມຈິງ

ຫົວໜ້າກົມປະຊາສໍາພັນໄທ ພ້ອມຄະນະ 6ທ່ານ ເຂົ້າພົບທູດລາວ ເພື່ອຂໍໂທດເປັນທາງການ ເລື່ອງນຳສະເໜີຂ່າວຂາດຂໍ້ມູນຄວາມຈິງ

ຕອນບ່າຍເວລາ 15:00 ໂມງ ຂອງວັນທີ 27 ທັນວາ 2021, ທ່ານ ພົນໂທ ສັນເສີນ ແກ້ວກໍາເນີດ, ຫົວຫນ້າກົມປະຊາສໍາພັນ ພ້ອມດ້ວຍຄະນະ 6 ທ່ານ ໄດ້ເຂົ້າພົບທ່ານ ແສງ ສຸຂະທິວົງ, ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ຣາຊະອານາຈັກໄທ ທີ່ສະຖານທູດລາວ

ເພື່ອມາຂໍໂທດກ່ຽວກັບການສະເໜີຂ່າວລົດໄຟຄວາມໄວສູງ ລາວ-ຈີນ ຊຶ່ງສື່ຂອງສະຖານີ ວິທະຍຸ ໂທລະພາບ ແຫ່ງປະເທດໄທ (NBT) ໄດ້ອອກຂ່າວທີ່ຂາດຂໍ້ມູນຄວາມຈິງໃນວັນທີ 6 ທັນວາ 2021 ທີ່ ຜ່ານມາໃນລາຍການ “ຟັງຊັດໆ ຖະຫນອມຈັດໃຫ້” ຂອງທ້າວ ຖະຫນອມ ອ່ອນເກດພົນ

ໄດ້ນໍາສະເຫນີຂ່າວທີ່ບໍ່ມີ ມູນຄວາມຈິງ ເຮັດໃຫ້ເຂົ້າໃຈວ່າ ລັດຖະບານລາວບໍ່ສາມາດໄຊ້ຫນີ້ຈີນໄດ້ ຈາກການກູ້ຢືມເງິນມາລົງທຶນສ້າງທາງ ລົດໄຟອັນມະຫາສານ ແລະ ຍັງດູຫມິ່ນຄົນລາວວ່າບໍ່ສາມາດຂີ່ລົດໄຟໄດ້ຍ້ອນປີ້ລົດໄຟແພງກວ່າລາຍຮັບຂອງ ພົນລະເມືອງລາວ.

ໃນການເຂົ້າພົບເພື່ອຂໍໂທດ, ທ່ານ ພົນໂທ ສັນເສີນ ແກ້ວກໍາເນີດ ໄດ້ກ່າວສະແດງຄວາມເສຍໃຈຕໍ່ ຄວາມຜິດພາດໃນການອອກຂ່າວຄັ້ງນີ້, ເຊິ່ງເພິ່ນເອງໃນນາມຜູ້ບັງຄັບບັນຊາໂດຍກົງຂອງໂທລະພາບຊ່ອງ NBT ໄດ້ຂໍໂທດທ່ານທູດ ແລະ ປະຊາຊົນລາວ ແລະ ຍອມຮັບວ່າເຄີຍເກີດມີຄວາມຜິດພາດໃນການສະເຫນີມາແລ້ວ ເທື່ອຫນຶ່ງ, ໂດຍຕອນນັ້ນໄດ້ມີຈົດຫມາຍຂໍໂທດເປັນທາງການວ່າຈະບໍ່ໃຫ້ມີເຫດການເກີດຂື້ນອີກ ແຕ່ມາເທື່ອນີ້ ໂທລະພາບ NBT ກໍ່ໄດ້ສະເຫນີຂ່າວຜິດພາດອີກຄັ້ງຫນຶ່ງ.

ສະນັ້ນຄັ້ງນີ້ຈຶ່ງໄດ້ນໍາພາຄະນະຜູ້ບໍລິຫານ ແລະ ນັກຂ່າວ ມາຂໍໂທດທີ່ສະຖານທູດໂດຍກົງ ເພື່ອສະແດງຄວາມຈິງໃຈ ແລະ ສໍານຶກໃນຄວາມຜິດທີ່ເກີດຂື້ນ ແລະ ຫວັງຢ່າງ ຍິ່ງວ່າຈະໄດ້ຮັບການອະໄພຈາກປະຊາຊົນລາວ ພ້ອມທັງຮັບປາກຢ່າງຫນັກແຫນ້ນວ່າ ຈະບໍ່ໃຫ້ເຫດການລັກຊະນະ ນີ້ເກີດຂື້ນອີກ, ພ້ອມດຽວກັນນີ້, ທ່ານພົນໂທ ສັນເສີນ ໄດ້ໃຫ້ທ້າວ ຖະຫນອມ, ນັກຂ່າວຊ່ອງ NBT ກ່າວຄໍາຂໍ ໂທດດ້ວຍຕົນເອງຕໍ່ທ່ານທູດ ແລະ ປະຊາຊົນລາວ ແລະ ຜູ້ກ່ຽວໄດ້ເອົາພວງມະໄລກາບຂໍໂທດໂດຍກົງຕໍ່ທ່ານ ທູດ ແລະ ປະຊາຊົນລາວທັງຊາດ ແລະ ຫວັງວ່າປະຊາຊົນລາວຈະໃຫ້ອະໄພຕົນຕໍ່ຄວາມຜິດພາດໃນຄັ້ງນີ້.

ຫຼັງຈາກນັ້ນ, ທ່ານທູດ ແສງ ໄດ້ຮັບຊາບຄໍາຂໍໂທດດັ່ງກ່າວ ໂດຍຈະນໍາເອົາການຂໍໂທດຄັ້ງນີ້ ແຈ້ງໃຫ້ ປະຊາຊົນຮັບຊາບ, ເຊິ່ງທ່ານທູດເຊື່ອຫມັ້ນວ່າປະຊາຊົນລາວຜູ້ມີຈິດໃຈໂອບເອື້ອອາລີ ຈະໃຫ້ອະໄພໃນຄວາມ ຜິດພາດຄັ້ງນີ້ ແລະ ສະແດງຄວາມຫວັງວ່າຈະບໍ່ເກີດຄວາມຜິດພາດໃນລັກຊະນະນີ້ເກີດຂື້ນອີກ.

ໃນໂອກາດນີ້ ທ່ານທູດ ໄດ້ເນັ້ນໃຫ້ເຫັນເຖິງຄວາມສໍາພັນ ລາວ-ໄທ ທີ່ເປັນເພື່ອນບ້ານໃກ້ຄຽງ ທີ່ມີຮີດຄອງປະເພນີ, ວັດທະນະທໍາ ແລະ ພາສາປາກເວົ້າ ທີ່ຄ້າຍຄືກັນ. ພ້ອມນີ້ ທ່ານທູດຍັງໄດ້ກ່າວຕື່ມວ່າ ຕໍ່ຫນ້າຫາກມີບັນຫາບໍ່ ເຂົ້າໃຈ ຫຼື ຕ້ອງການຂໍ້ມູນລະອຽດ ກໍ່ຂໍໃຫ້ຕິດຕໍ່ປະສານມາຍັງສະຖານທູດເພື່ອຂໍຂໍ້ມູນຂ່າວສານທີ່ຖືກຕ້ອງຕາມ ຄວາມເປັນຈິງ ເພື່ອສະເຫນີຂ່າວທີ່ເຮັດໃຫ້ສັງຄົມຮັບຮູ້ ແລະ ມີຄວາມເຂົ້າໃຈທີ່ຖືກຕ້ອງ.່

ທ່ານທູດ ຍັງໄດ້ຍົກໃຫ້ເຫັນຄວາມຫມາຍຄວາມສໍາຄັນຂອງໂຄງການລົດຄວາມໄວສູງ ລາວ-ຈີນ ທີ່ເປັນ ເສັ້ນທາງປະຫວັດສາດ ແລະ ແມ່ນເສັ້ນທາງທໍາອິດສໍາລັບປະຊາຊົນລາວ. ປະຊາຊົນລາວ ມີຄວາມພາກພູມໃຈໃນ ການເປີດການນໍາໃຊ້ລົດໄຟຄວາມໄວສູງດັ່ງກ່າວ, ເຊິ່ງໂຄງການນີ້ ແມ່ນເພື່ອຜົນປະໂຫຍດຂອງປະຊາຊົນລາວ, ປະຊາຊົນປະເທດເພື່ອນບ້ານ, ປະເທດອາຊຽນ ແລະ ພາກພື້ນໃນອານາຄົດ.ສຸດທ້າຍນີ້, ທ່ານທູດ ໄດ້ເຫນັ້ນຄືນຈຸດຢືນຂອງລັດຖະບານ ສປປ.

ລາວ ຍາມໃດ ກໍພະຍາຍາມເສີມ ຂະຫຍາຍ ສາຍພົວພັນມິດຕະພາບຖານບ້ານໃກ້ເຮືອນຄຽງທີ່ດີນໍາກັນຂອງສອງປະເທດ ໃຫ້ນັບມື້ຈະເລີນກ້າວຫນ້າ, ເຊິ່ງຕົນເອງໃນນາມທູດ ຈະທຸ້ມເທເຫື່ອແຮງສືບຕໍ່ຊຸກຍູ້ການພົວພັນ ແລະ ການຮ່ວມມືຂອງສອງປະເທດ ໃຫ້ຈະເລີນງອກງາມຍິ່ງໆຂື້ນ.

ຂ່າວບັນເທີງ ຂ່າວລາວ