ສຕລ ຖະແຫລງເຫດຜົນທີ່ທີມຊາດລາວຊຸດໃຫຍ່ ຜົນງານບໍ່ດີໃນການເຂົ້າຮ່ວມແຂ່ງຂັນລາຍການ AFF SUZUKI CUP 2020

ສຕລ ຖະແຫລງເຫດຜົນທີ່ທີມຊາດລາວຊຸດໃຫຍ່ ຜົນງານບໍ່ດີໃນການເຂົ້າຮ່ວມແຂ່ງຂັນລາຍການ AFF SUZUKI CUP 2020

ວັນທີ 7 ມັງກອນ 2022 ທີ່ຫ້ອງປະຊຸມສູນຝຶກສະຫະພັນບານເຕະແຫ່ງຊາດລາວ (ສຕລ), ສະຫນາມກິລາແຫ່ງຊາດຫລັກ 16, ນະຄອນຫລວງວຽງຈັນ, ທ່ານ ຄໍາແພງ ວົງຂັນຕີ, ຮອງປະທານສະຫະພັນບານເຕະແຫ່ງຊາດລາວ ແລະ ຄະນະ ໄດ້ຮ່ວມກັນຖະແຫລງຂ່າວກ່ຽວກັບການສົ່ງນັກກິລາບານເຕະທີມຊາດລາວ ໃນການເຂົ້າຮ່ວມການແຂ່ງຂັນບານເຕະຊີງແຊ້ມອາຊຽນ ປະຈຳປີ 2020 (AFF SUZUKI CUP 2020) ທີ່ປະເທດສິງກະໂປ ເປັນເຈົ້າພາບ ຈັດຂຶ້ນລະຫວ່າງ ວັນທີ 5 ທັນວາ 2021–1 ມັງກອນ 2022 ຜ່ານມາ, ເຊີ່ງທີມຊາດລາວຖືກຈັດຢູ່ໃນກຸ່ມ B ປະກອບມີ: ຫວຽດ ນາມ, ມາເລເຊຍ, ອິນໂດເນເຊຍ, ກໍາປູເຈຍ ແລະ ລາວ.

ຜ່ານການແຂ່ງຂັນໃນຮອບແບ່ງກຸ່ມ, ທີມຊາດລາວ ພາຍໃຕ້ການຄຸມທີມຂອງ ທ່ານ ເຊວາໄຣ ເວັນກາດາຣາມ ຄູຝຶກຊາວສິງກະໂປ ເສຍລວດທັງ 4 ນັດ, ຍິງໄດ້ພຽງ 1 ປະຕູ ແລະ ເສຍໄປທັງໝົດ 14 ປະຕູ ໂດຍເສຍໃຫ້ ທີມຊາດ ຫວຽດນາມ 0-2, ເສຍໃຫ້ ທີມຊາດມາເລເຊຍ 0-4, ເສຍໃຫ້ ທີມຊາດອິນໂດເນເຊຍ 1-5 ແລະ ເສຍໃຫ້ ທີມຊາດກຳປູເຈຍ 0-3. ເຮັດໃຫ້ບໍ່ມີຈັກຄະແນນ, ຢູ່ອັບດັບສຸດທ້າຍຂອງຕາລະລາງ.

ທ່ານ ນາງ ກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງຊາດລາວ ໃຫ້ຮູ້ວ່າ: ສາເຫດທີ່ເຮັດໃຫ້ທີມຊາດລາວຜົນງານບໍ່ດີໃນການເຂົ້າຮ່ວມແຂ່ງຂັນຄັ້ງນີ້ ຍ້ອນການແຂ່ງຂັນບານເຕະລາຍການຕ່າງໆ ພາຍໃນປະເທດຖືກໂຈະການແຂ່ງຂັນ ເນື່ອງຈາກການລະບາດຂອງພະຍາດໂຄວິດ-19 ເຮັດໃຫ້ນັກກິລາບໍ່ໄດ້ລົງແຂ່ງຢ່າງຕໍ່ເນື່ອງ, ນັກກິລາທີມຊາດຊຸດນີ້ມີເວລາເຂົ້າສູນເຝິກຊ້ອມບໍ່ພຽງພໍ, ຂະນະທີ່ 4 ທີມຢູ່ຮ່ວມກຸ່ມດຽວລ້ວນແຕ່ມີສະໂມສອນບານເຕະອາຊີບ ແລະ ມີນັກກິລາໄປແຂ່ງຂັນຢູ່ບັນດາລີກໃນຕ່າງປະເທດ

ສ່ວນລາວເຮົາມີພຽງສະໂມສອນກິລາເຄີ່ງອາຊີບ, ມີນັກກິລາທີ່ເປັນຕົວເລືອກຕິດທີມຊາດໜ້ອຍ ແລະ ນັກກິລາສ່ວນໃຫຍ່ຍັງໜຸ່ມນ້ອຍທີ່ມີປະສົບການບໍ່ຫລາຍ, ສ່ວນນັກກິລາທີ່ມີປະສົບການ ແລະ ມີຄວາມສາມາດຫລາຍຄົນບໍ່ສາມາດເຂົ້າຮ່ວມແຂ່ງຂັນໃນລະດັບທີມຊາດໄດ້ ຍ້ອນຖືກລົງໂທດຈາກສະຫະ ພັນບານເຕະສາກົນ ຫລື FIFA ເພາະມີສ່ວນພົວພັນກັບການລ໊ອກຜົນບານ. ສໍາລັບນັກກິລາລາວແຂ່ງຂັນຢູ່ຕ່າງປະເທດທີ່ຮຽກຕົວມາຕິດທີມຊາດແມ່ນມີເວລາເຝິກຊ້ອມກັບໝູ່ໃນທີມໜ້ອຍເກີນໄປ.

ໃນການຖະແຫລງຂ່າວຄັ້ງນີ້ ຍັງໄດ້ປະກາດແຕ່ງຕັ້ງ ທ່ານ ໄມເຄິ້ນ ໄວສ໌ ຄູຝຶກຊາວເຢຍລະມັນ ອາຍຸ 56 ປີ ເຂົ້າມາຄຸມທີມຊາດລາວ ດ້ວຍການເຊັນສັນຍາ 3 ປີ ແລະ ຈະຄຸມທີມຊາດລາວ ຮຸ່ນອາຍຸບໍ່ເກີນ 23 ປີ ເຂົ້າຮ່ວມບານເຕະຊາຍ ອາຍຸບໍ່ເກີນ 23 ປີ ( AFF U23 Championship 2022 ) ຊິງແຊ້ມອາຊຽນ 2022 ທີ່ປະເທດກຳປູເຈຍ ເປັນເຈົ້າພາບ ໃນລະຫວ່າງວັນທີ 14-26 ກຸມພາ 2022, ລວມເຖີງຈະຄຸມທີມຊາດລາວເຂົ້າຮ່ວມການແຂ່ງຂັນຊີເກມ ຄັ້ງທີ XXXI ຢູ່ ຫວຽດນາມ ທີ່ເລື່ອນຈາກປີ 2021 ມາແຂ່ງຂັນໃນລະຫວ່າງວັນທີ 12-23 ພຶດສະພາ 2022.

ຂ່າວລາວ