ໂຄວິດ-19 ນັບແຕ່ມີການລະບາດ ລາວເຮົາຕິດເຊື້ອສະສົມ 1ແສນກວ່າຄົນ ແລະ ເສຍຊີວິດແລ້ວ 4ຮ້ອຍກວ່າຄົນ

ໂຄວິດ-19 ນັບແຕ່ມີການລະບາດ ລາວເຮົາຕິດເຊື້ອສະສົມ 1ແສນກວ່າຄົນ ແລະ ເສຍຊີວິດແລ້ວ 4ຮ້ອຍກວ່າຄົນ

ດຣ. ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ກ່າວໃນພິທີຖະແຫຼງຂ່າວ ປະຈໍາວັນທີ 9 ມັງກອນ ປີ 2022 ນີ້ວ່າ: ສປປ ລາວ ນັບແຕ່ເກີດລະບາດຂອງພະຍາດໂຄວິດ-19 ມາຮອດປັດຈຸບັນ ທົ່ວປະເທດມີຄົນຕິດເຊື້ອພະຍາດໂຄວິດ-19 ສະສົມຮອດມື້ນີ້ 118.880 ຄົນ ແລະ ເສຍຊີວິດສະສົມຫຼາຍກວ່າ 437 ຄົນ

ເຫັນວ່າໃນທ້າຍປີ 2021 ມີສະພາບຄົນເຈັບໜັກ ແລະ ເສຍຊີວິດເພີ່ມຂື້ນ ແລະ ປະຈຸບັນໃນແຕ່ລະວັນກໍຍັງສືບຕໍ່ມີລາຍງານຜູ້ຕິດເຊື້ອໃໝ່ ຈາກທຸກແຂວງໃນທົ່ວປະເທດ ແລະ ແຂວງທີ່ມີການຕິດເຊື້ອສູງແຕ່ລະວັນມີ ນະຄອນຫຼວງວຽງຈັນ, ອຸດົມໄຊ, ຫຼວງນ້ຳທາ, ຫຼວງພະບາງ, ວຽງຈັນ ແລະ ບໍ່ແກ້ວ ຕາມລຳດັບ.

ໃນໄລຍະນີ້ມີຫຼາຍຄົນທີ່ພາຍຫຼັງເດີນທາງກັບມາຈາກການໄປຢ້ຽມຢາມຄອບຄົວພີ່ນ້ອງ ແລະ ໄປທ່ອງທ່ຽວໃນສະຖານທີ່ຕ່າງໆໃນໄລຍະປີໃໝ່ສາກົນກໍ່ຂໍໃຫ້ຕິດຕາມອາການຕົນເອງ, ຖ້າມີອາການບໍ່ສະບາຍ ຫຼື ໄດ້ສຳຜັດໃກ້ຊິດກັບຜູ້ຕິດເຊື້ອແມ່ນໃຫ້ໄປເກັບຕົວຢ່າງໃນສະຖານທີ່ຄະນະສະເພາະກິດໄດ້ກຳນົດໄວ້ ໂດຍທັນທີ

ຖ້າຫາກເປັນກຸ່ມສ່ຽງ ການກວດຊອກຫາເຊື້ອພະຍາດດ້ວຍຕົນເອງແບບໄວ ແມ່ນຍັງບໍ່ພຽງພໍເນື່ອງຈາກເຄື່ອງກວດແບບໄວແມ່ນມີຫຼາຍຊະນິດ ບາງອັນບໍ່ໄດ້ຮັບ ຮອງຈາກອົງການອະນາໄມໂລກເຮັດໃຫ້ການກວດຫາເຊື້ອາດຈະບໍ່ຊັດເຈນ ເພາະການກວດເຄື່ອງກວດແບບໄວຈະພົບເຊື້ອກໍ່ຕໍ່ເມື່ອຄົນທີ່ຕິດເຊື້ອມີອາການສະແດງອອກ ແຕ່ຄົນທີ່ບໍ່ມີອາການສະແດງກວດຈະບໍ່ຂື້ນ ເຊີ່ງເຮັດໃຫ້ເຂົ້າໃຈວ່າຕົນເອງບໍ່ຕິດເຊື້ອແລ້ວໄປໃຊ້ຊີວິດປົກກະຕິ ເຊິ່ງຈະເຮັດໃຫ້ມີການແຜ່ເຊື້ອໃສ່ຄົນອື່ນ ແລະ ຄົນໃນຄອບຄົວ ຫຼື ໄດ້ຮັບການການປີ່ນປົວຊັກຊ້າ, ຮ້າຍແຮງໄປກ່ວານັ້ນອາດຈະເຮັດໃຫ້ເຖີງຂັ້ນຮຸນແຮງ ຫຼື ເສຍຊີວິດໄດ້. ດັ່ງນັ້ນ, ເພື່ອຮັບປະກັນຖ້າຫາກເປັນກຸ່ມສ່ຽງ ທີ່ໃກ້ຊິດກັບຜູ້ທີ່ຕິດເຊື້ອແມ່ນຕ້ອງໄປກວດດ້ວຍເຄື່ອງກວດ RT PCR

ຂ່າວລາວ