ສະຖານທູດຣັດເຊຍ ປະຈໍາລາວ ຖະແຫລງສະພາບ ການປະຕິບັດການພິເສດທາງທະຫານ ໃນອູແກຣນ

ສະຖານທູດຣັດເຊຍ ປະຈໍາລາວ ຖະແຫລງສະພາບ ການປະຕິບັດການພິເສດທາງທະຫານ ໃນອູແກຣນ

ໃນວັນທີ 3 ມິຖຸນາ 2022, ຢູ່ສູນວິທະຍາສາດ ແລະ ວັດທະນະທໍາ ສະຫະ ພັນຣັດເຊຍ ນະຄອນຫລວງວຽງຈັນ, ທ່ານ ດານິລ ອາ ໂວໂດປີອານອບ ເລຂານຸການຕີ ປະຈຳສະຖານທູດ ສະຫະພັນຣັດເຊຍ ປະຈຳລາວ ໄດ້ຖະແຫລງຄວາມຄືບໜ້າສະພາບການໃນ ອູແກຣນ ບ່ອນທີ່ມີການປະຕິບັດການພິເສດທາງທະຫານ ວ່າ: ປັດຈຸບັນ, ຫລາຍພື້ນທີ່ມີການປະຕິບັດການພິເສດທາງທະຫານ ແມ່ນໄດ້ຖືກປົດປ່ອຍເເລ້ວ, ຊີວິດທີ່ສະຫງົບສຸກໄດ້ຮັບການສ້າງຕັ້ງຂຶ້ນ, ເສດຖະກິດ, ອຸດສາຫະກຳ ໄດ້ຮັບການຟື້ນຟູ, ມີການກໍ່ສ້າງພື້ນຖານໂຄງລ່າງ, ວິສາຫະກິດ ເລີ່ມດຳເນີນງານ, ໂຮງຮຽນ, ໂຮງຮຽນອະນຸບານ, ໂຮງໝໍໄດ້ຮັບການເປີດຄືນອີກຄັ້ງ ແລະ ສະຫະພັນຣັດເຊຍ ຢືນຢັນຄວາມພ້ອມທີ່ຈະເຂົ້າຮ່ວມຢ່າງຕັ້ງໜ້າໃນການຟື້ນຟູເຂດທີ່ປົດປ່ອຍແລ້ວ.

ຣັດເຊຍ ສືບຕໍ່ເອົາໃຈໃສ່ສະໜອງການຊ່ວຍເຫລືອ ດ້ານມະນຸດສະທຳໃຫ້ແກ່ ເຂດປົດປ່ອຍ ອູແກຣນ ແລະ ກະຊວງປ້ອງກັນປະເທດ ຣັດເຊຍ ປະກາດເປີດແລວທາງມະນຸດສະທໍາ ເພື່ອການຍົກຍ້າຍພົນລະເຮືອນຢ່າງປອດໄພ ທັງໃນທິດທາງຕາເວັນອອກ ແລະ ຕາເວັນຕົກ. ປັດຈຸບັນ ປະຊາຊົນຈຳນວນ 1,6 ລ້ານຄົນໄດ້ເຂົ້າໄປ ໃນປະເທດຣັດເຊຍແລ້ວ. ໃນນີ້ ມີເດັກນ້ອຍຫລາຍກວ່າ 263 ພັນຄົນ ແລະ ຍັງອີກປະມານ 3 ລ້ານຄົນ ສະແດງຄວາມປາຖະໜາທີ່ຈະອົບພະຍົບໄປຣັດເຊຍ ຫລື ອະນາເຂດປົດປ່ອຍອື່ນໆຂອງອູແກຣນ.

ທ່ານ ດານິລ ອາ ໂວໂດປີອານອບ ໄດ້ໃຫ້ຮູ້ອີກວ່າ: ການເຄື່ອນໄຫວພິເສດທາງ ທະຫານ ຕ້ອງໃຊ້ເວລາດົນນານ ເພາະວ່າທະຫານຣັດເຊຍ ທີ່ເຂົ້າຮ່ວມການເຄື່ອນໄຫວດັ່ງກ່າວ ໄດ້ຮັບຄຳສັ່ງໃຫ້ຫລີກລ້ຽງການບຸກໂຈມຕີ ພື້ນຖານໂຄງລ່າງພົນລະເຮືອນ, ການໂຈມຕີແມ່ນຂຶ້ນກັບສະຖານທີ່ທາງການທະຫານ, ອຸປະກອນການທະຫານ ແລະ ຖານທັບເທົ່ານັ້ນ.

ຂ່າວຕ່າງປະເທດ