ສະຫະລັດກ່າວວ່າ ຣັດເຊຍ ກໍ່ອາດຊະຍາກໍາສົງຄາມຢູ່ໃນ”ຢູເຄຣນ”

ສະຫະລັດກ່າວວ່າ ຣັດເຊຍ ກໍ່ອາດຊະຍາກໍາສົງຄາມຢູ່ໃນ”ຢູເຄຣນ”

ສະຫະລັດ ໄດ້ຊັ່ງ​ຊາ​ວ່າ ສະມາຊິກຂອງກອງທັບຣັດເຊຍ ນັບຕັ້ງແຕ່ທີ່ພວກເຂົາເລີ້ມ​ການ​ບຸກ​ລຸກ​ເຂົ້າ​ໄປ​ໃນ ຢູເຄຣນ ເມື່ອເດືອນແລ້ວນີ້, ໄດ້ກໍ່ອາຊະຍາກໍາສົງຄາມ​ຢູ່​ທີ່ນັ້ນ ແລະການໃຫ້ຄໍາໝັ້ນວ່າ ຄວາມຮັບຜິດຊອບທັງໝົດເຫຼົ່າ ນັ້ນ ຈະຕ້ອງໄດ້ຮັບການຮັບຜິດຊອບ.

ໃນຂະນະທີ່ ຣັດເຊຍ ຍັງສືບ​ຕໍ່ໂຈມຕີເປົ້າໝາຍທາງພົນລະເຮືອນຢູ່ໃນນະຄອນ ຫຼວງກີຢິບ, ຫົວເມືອງໃຫຍ່ໆແລະຫົວເມືອງອື່ນໆ​ຢູ່ນັ້ນ, ເຈົ້າໜ້າທີ່ກະຊວງການຕ່າງປະເທດໄດ້ລະມັດລະວັງທີ່ຈະຮ້ອງການໂຈມຕີດັ່ງກ່າວວ່າເປັນອາດຊະຍາກໍາສົງຄາມ ໂດຍກ່າວວ່າ ຈໍາເປັນຈະຕ້ອງມີເອກະສານອ້າງອີງ ແລະ ການສອບສວນກ່ອນ.

ທ່ານນາງເບັດຕ໌ ແວນ ຊາກ (Beth Van Schaack) ເອກອັກຄະລັດຖະທູດຂອງສະຫະລັດ ​ແມ່ນ​ຮັບ​ຜິດ​ຊອບ​ໃນ​ດ້ານຄວາມຍຸຕິທໍາ ​ກ່ຽວ​ກັບ ອາ​ຊະຍາ​ກຳ​ຂອງໂລກ. ທ່ານນາງໄດ້ຮັບການຢືນຢັນຈາກສະພາສູງເມື່ອອາທິດແລ້ວນີ້ ແລະ ມີການປະກາດອັນສໍາຄັນ ໃນມື້ທີສອງທີ່ຈະຕ້ອງດໍາເນີນງານໃນໜ້າທີ່ຂອງທ່ານນາງ. ທ່ານນາງກ່າວວ່າ ການທົບ​ທວນ ຢ່າງລະມັດລະວັງ ​ເວ​ລານີ້ ແມ່​ນ​ມີ​ຂຶ້ນແລ້ວ.

ທ່ານນາງເບັດຕ໌ ແວນ ຊາກ, ເອກອັກຄະລັດຖະທູດສະຫະລັດ ຮັບ​ຜິດ​ຊອບ ດ້ານຄວາມ​ຍຸ​ຕິ​ທຳ​ກ່ຽວ​ກັບອາດ​ຊະ​ຍາ​ກຳ​ຂອງໂລກກ່າວວ່າ:

“ໃນມື້ເຊົ້ານີ້, ລັດຖະມົນຕີກະຊວງການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ອອກຖະແຫຼງການ ປະ​ກາດວ່າ ຈາກຂໍ້ມູນ ທີ່ມີຢູ່ໃນປັດຈຸບັນນີ້, ລັດຖະບານຂອງສະຫະລັດໄດ້ມີການຊັ່ງ​ຊາວ່າ ກອງກໍາລັງທະຫານຂອງ ຣັດເຊຍ ​ພວມກໍ່ອາດຊະຍາກໍາສົງຄາມ ຢູ່ໃນຢູເຄຣນ.”

ທ່ານນາງ ແວນ ຊາກ ກ່າວວ່າ ສະຫະລັດແລະປະເທດພາ​ຄີຂອງພວກເຂົາເຈົ້າ ພາກັນຕື່ນຕົກໃຈຢ່າງແຮງ ເມື່ອເຫັນຮູບພາບ ຂອງກອງກໍາລັງຣັດເຊຍ ແລະການໂຈມຕີທາງເຮືອບິນຂອງພວກເຂົາ ໄດ້ຖືກ​ສະ​ຖານ​ທີ່​ທາງພົນລະເຮືອນຢູ່ໃນເມືອງມາຣິອູໂປລ, ລວມເຖິງໂຮງໝໍປະດຸງຄັນ, ຫໍພິພິທະພັນ ແລະໂຮງຮຽນ​ສິນ​ລະ​ປະນໍາອີກດ້ວຍ.

ບັນດານັກຂ່າວໄດ້ຖາມທ່ານນາງວ່າ ​ການ​ຊັ່​ງ​ຊາ​ອາດຊະຍາກໍາສົງຄາມດັ່ງ​ກ່າວ​ແມ່ນໄດ້ກວມ​ເອົາປະທານາທິບໍດີຂອງຣັດເຊຍ ທ່ານວລາດີເມຍ ປູຕິນ ຫຼືບໍ່? ເຊິ່ງທ່ານນາງ ແວນ ຊາກ ໄດ້ກ່າວວ່າ:

“​ແລະດັ່ງທີ່ພວກເຈົ້າ ໄດ້ກ່າວເຖິງ, ມັນເປັນການຈັດ​ຕັ້ງ ​ໃນ​ການ​ບັງ​ຄັບບັນຊາ ເມື່ອເວົ້າ​ເຖິງ​ໃນເລື້ອງ​ທະ​ຫານ ດັ່ງກອງທັບຂອງຣັດເຊຍ. ຕາມຫຼັກທິ​ສ​ດີແລ້ວ ພວກເຮົາສາມາດຖື​ໄດ້​ວ່າ ​ພວກ​ທີ່​ສັ່ງ​ການ​ໂດຍ​ກົງ​ເປັນຜູ້​ຮັບ​ຜິດ​ຊອບພາຍໃຕ້ກົດໝາຍລະຫວ່າງປະເທດ, ພວກ​ທີ່ອາດເປັນຜູ້ສົມຮູ້ຮ່ວມຄິດ ຫຼື​ອື່ນໆ​ທີ່​ມີ​ການພົວພັນກັບບາງປະເພດ ອົງກອນອາດຊະຍາກໍາອື່ນໆ ຮ່ວມກັບຜູ້ກະທໍາຄວາມຜິດ.”

ເຖິງແມ່ນພາບວີດີໂອຈະສະແດງໃຫ້ເຫັນວ່າ ໂຮງໝໍຕ່າງໆ ແລະສະຖານທີ່ບໍລິ ການສາທາລະນະອື່ນໆໄດ້ຖືກລະເບີດ, ຣັດເຊຍ ກໍຍັງປະຕິເສດວ່າ ບໍ່ໄດ້ຕັ້ງ​ໃຈ​ແນເປົ້າໝາຍໂຈມຕີໃສ່ພົນລະເຮືອນ.

ເຈົ້າໜ້າທີ່ສະຫະລັດກ່າວວ່າ ໃນທີ່ສຸດແລ້ວ ຄວາມຮັບຜິດຊອບເຫຼົ່ານັ້ນ ຈະຂຶ້ນຢູ່ກັບການພິຈາລະນາຂອງສານ ຢູ່ໃນຂອບເຂດຂອງອໍານາດ ກ່ຽວ​ກັບ​ເລື້ອງນີ້. ທ່ານນາງ ໂອກຊານາ ມາຣ໌ກາໂຣວາ (Oksana Markarova), ເອກອັກຄະລັດຖະທູດຢູເຄຣນປະຈໍາສະຫະລັດ ກ່າວຢູ່ທີ່ສະຖາບັນສັນຕິພາບ ສະຫະລັດ ເຖິງຄ້າຍກັກກັນ ທີ່ເຂັ້ມງວດແຫ່ງທໍາອິດ ຂອງນາຊີວ່າ ສ້າງຂຶ້ນເມື່ອປີ 1933 ໃກ້ໆກັບເມືອງ ມິວນິກ (Munich).

ທ່ານນາງໂອກຊານາ ມາຣ໌ກາໂຣວາ ເອກອັກຄະລັດຖະທູດຢູເຄຣນປະຈໍາສະຫະລັດກ່າວວ່າ:

“ໜ້າເສຍດາຍ, ມາໃນມື້ນີ້ ປະຫວັດສາດໄດ້ກັບມາຊໍ້າຮອຍ ດ້ວຍໂຕຂອງມັນເອງ, ແລະມື້ນີ້ ມັນກໍເກີດຂຶ້ນອີກຄັ້ງຢູ່ໃນ​ໃຈກາງຂອງຢູໂຣບ ເຊິ່ງນະເວລານີ້ ແມ່ນຢູ່ໃນຢູເຄຣນ. ພວກເຮົາກໍາລັງກ່າວເຖິງຄວາມໂຫດຮ້າຍ, ເວົ້າເຖິງອາດ ຊະຍາກໍາສົງຄາມ ແລະອາດຊະຍາກໍາຕ້ານມະນຸດຊາດ.”

ນັກຊ່ຽວຊານດ້ານກົດໝາຍລະຫວ່າງປະເທດ ທ່ານເຈນ ສຕຣອມເຊັດທ໌ (Jane Stromseth) ກ່າວວ່າ ສານອາຍາລະຫວ່າງປະເທດ ຫຼື ICC ໄດ້ເລີ້ມຕົ້ນດໍາເນີນການສືບສວນໃນຢູເຄຣນ ແລ້ວ.

ທ່ານເຈນ ສຕຣອມເຊັດທ໌, ນັກຊ່ຽວຊານທາງດ້ານກົດໝາຍ ຂອງຈອ​ຣ໌​ຈທາວ ກ່າວວ່າ:

“ດັ່ງທີ່ທ່ານເອກອັກຄະລັດຖະທູດກ່າວໄວ້, ໄອຍະການແຫ່ງ ICC ໄດ້ເລີ້ມຕົ້ນ ດໍາເນີນການສືບສວນ ແລະສົ່ງທີມນັກສືບສວນ ໄປທີ່ປະເທດ ຢູເຄຣນ ແລ້ວ, ໂຕຂອງທ່ານເອງ ກໍໄດ້ໄປຢູເຄຣນ ມາແລ້ວ ພ້ອມທັງໄດ້ສົນທະນາກັບເຈົ້າໜ້າທີ່ຄົນອື່ນໆ ລວມທັງປະທານາທິບໍດີ ເຊເລັນສກີ.”

ປະທານາທິບໍດີ ໂຈ ໄບເດັນ ມີທ່​າ​ທາງວ່າຈະປຶກສາຫາລືກ່ຽວກັບອາດຊະຍາກໍາສົງຄາມຂອງຣັດເຊຍ ຢູ່ໃນຢູເຄຣນ ກັບປະເທດພັນທະມິດອົງການ NATO ແລະປະເທດອື່ນໆໃນນະຄອນຫຼວງ ບຣັສເຊີລ​ສ໌.

ແອັສໂທເນຍ, ລີທົວເນຍ, ເຢຍຣະມັນ, ໂປແລນ, ສະໂລວາເກຍ ແລະ ສະວີເດັນ ຕ່າງກໍພາກັນດໍາເນີນການສືບສວນ ຄວາມເປັນໄປໄດ້ຂອງອາດຊະຍາກໍາສົງຄາມຢູ່ໃນຢູເຄຣນ, ເພື່ອຊອງ​ຫາ​ຊ່ອງ​ທາງຮັກ​ສາ​ຫຼັກຖານ​ ສຳ​ລັບ​ການ​ເອົາຄວາມຮັບຜິບຊອບ ໃນອະນາຄົດ.

ຂ່າວຕ່າງປະເທດ