ທາງ​ລົດ​ໄຟ​ລາວ-ຈີນຮັບປະກັນປະສິດທິ​ຜົນ ​ແລະ​ ຄວາມວ່ອງໄວໃນການຂົນສົ່ງສິນຄ້າທີ່ສຳຄັນ

ທາງ​ລົດ​ໄຟ​ລາວ-ຈີນຮັບປະກັນປະສິດທິ​ຜົນ ​ແລະ​ ຄວາມວ່ອງໄວໃນການຂົນສົ່ງສິນຄ້າທີ່ສຳຄັນ

ເວລາ 5:36 ຂອງວັນທີ 7 ມິຖຸນາ, ລົດໄຟສິນຄ້າຂະບວນ 30002 ບັນຈຸຕູ້ຄອນເທັນເນີ 48 ຕູ້ ທີ່ຂົນສົ່ງເກືອໂພແທດຊຽມຈຳນວນ 1252,2 ໂຕນ ໄດ້ສົ່ງອອກຈາກສະຖານີຂົນສົ່ງສິນຄ້າວຽງຈັນໃຕ້. ຖືໄດ້ວ່າເປັນການຈັດຕັ້ງ​ປະຕິບັດການຂົນ​ສົ່ງສິນຄ້າທີ່ສຳຄັນຂອງບໍລິສັດທາງ​ລົດ​ໄຟ​ລາວ-ຈີນ ​ຈຳກັດ​, ເຊິ່ງປາຍທາງຂອງການຂົນສົ່ງຄັ້ງນີ້ແມ່ນ​ສະຖານີ​ບ້ານ​ຖວນເຈ ນະຄອນສົງຊິ້ງ ປະເທດຈີນ ໂດຍຜ່ານ​ດ່ານ ບໍ່ເຕ່ນ-ບໍ່ຫ່ານລາວຈີນ ໃນ​ຕອນ​ທ່ຽງ​ຂອງ​ວັນ​ດຽວ​ກັນ.

ນັບແຕ່ຕົ້ນປີເປັນຕົ້ນມາ, ບໍລິສັດທາງລົດໄຟລາວ-ຈີນ ໄດ້ເລີ່ມຈັດຕັ້ງປະຕິບັດແຜນການຂົນ​ສົ່ງສິນຄ້າທີ່ສຳຄັນຢ່າງຮອບດ້ານ ໂດຍເນັ້ນໃຫ້ບຸລິມະສິດໃນການຂົນສົ່ງສິນຄ້າທີ່ນຳເອົາຜົນປະໂຫຍດຕໍ່ການເປັນຢູ່ຂອງປະຊາຊົນຄື: ບຸລິມິສິດໃນການຈັດການ, ບຸລິມິສິດໃນການຈັດລົດ, ບຸລິມິສິດໃນການບັນທຸກໃສ່ລົດ, ບຸລິມິສິດໃນການປ່ອຍອອກກ່ອນ ແລະ ບຸລິມິສິດໃນການຍໍລົງລົດ ແລະ ມາດຕະການການຂົນສົ່ງອື່ນໆ.

ນັບຕັ້ງແຕ່ເປີດນຳໃຊ້ທາງລົດໄຟລາວ-ຈີນເປັນຕົ້ນມາ, ລົດໄຟຂົນສົ່ງສິນຄ້າຂ້າມແດນຂອງທາງລົດໄຟລາວ-ຈີນ ໄດ້ມີການຂົນສົ່ງສິນຄ້າຫຼາຍກວ່າ 10 ປະເພດ ກວມເອົາຫຼາຍກວ່າ 100 ຊະນິດ, ແນໃສ່ການຂົນສົ່ງພາກພື້ນເຊັ່ນ: ໄທ, ມາເລເຊຍ, ມຽນມາ, ສິງກະໂປ ແລະ ປະເທດອື່ນໆລວມກວ່າ 10 ປະເທດ.

ການຂົນສົ່ງສິນຄ້າຈາກຈີນມາລາວສ່ວນໃຫຍ່ຈະແມ່ນ ສິນຄ້າທີ່ໃຊ້ໃນຊີວິດປະຈຳວັນທົ່ວໄປ, ຝຸ່ນ, ເຄື່ອງເອເລັກໂທຣນິກ, ເຄື່ອງຜະລິດໄຟຟ້າແສງຕາເວັນ, ແຜ່ນແພ, ຜັກ ແລະ ອື່ນໆ; ສ່ວນການຂົນສົ່ງສິນຄ້າຈາກລາວໄປຈີນ ສ່ວນໃຫຍ່ຈະເປັນຜະລິດຕະພັນກະສິກຳເຊັ່ນ: ມັນຕົ້ນ, ຢາງພາລາ, ໝາກເດືອຍ, ແປ້ງມັນຕົ້ນ ແລະ ອື່ນໆ, ສິນຄ້າປະເພດໂລຫະເຊັ່ນ: ເຫຼັກ, ສັງກະສີ ແລະ ອື່ນໆ, ສິນຄ້າປະເພດຫມາກໄມ້ກໍຈະເປັນ ໝາກຖົ່ວລຽນເປັນຕົ້ນ. ມາ​ຮອດ​ວັນ​ທີ 6 ມິຖຸນາ​, ປະລິມານ​ການ​ຂົນ​ສົ່ງ​ສິນຄ້າ​ຂ້າມ​ແດນ​ຂອງ​ທາງ​ລົດ​ໄຟ​ລາວ-ຈີນ​ໄດ້ເກີນ 651.000 ​ໂຕນ, ສະແດງໃຫ້ເຫັນເຖິງບົດບາດ​ການເປັນຊ່ອງທາງ​ການ​ຂົນ​ສົ່ງ​ສາກົນທີ່ສຳຄັນທີ່ນັບ​ມື້​ນັບ​ມີຄວາມຊັດເຈນຫຼາຍຂຶ້ນ.

ຂ່າວລາວ