ທ່ານທອງລຸນ ເນັ້ນໃຫ້ສະຖາບັນການເມືອງ-ການປົກຄອງ ສ້າງພະນັກງານໃຫ້ມີແນວຄິດແບບ ທ່ານ ໄກສອນ ພົມວິຫານ ແລະ ມາກ-ເລນິນ

ທ່ານທອງລຸນ ເນັ້ນໃຫ້ສະຖາບັນການເມືອງ-ການປົກຄອງ ສ້າງພະນັກງານໃຫ້ມີແນວຄິດແບບ ທ່ານ ໄກສອນ ພົມວິຫານ ແລະ ມາກ-ເລນິນ

ໃນວັນທີ 9 ມິຖຸນາ 2022, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ໂອ້ລົມ ພະນັກງານຫຼັກແຫຼ່ງ ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ

ໂດຍໃຫ້ກຽດຕ້ອນຮັບຢ່າງອົບອຸ່ນຂອງ ສະຫາຍ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງ ແຫ່ງຊາດ ພ້ອມດ້ວຍຄະນະ, ມີບັນດາຄະນະກົມ, ຫ້ອງການ, ຄະນະຕ່າງໆ, ສູນຂໍ້ມູນຂ່າວສານ ແລະ ສູນຄົ້ນຄວ້າແນວຄິດ ໄກສອນ ພົມວິຫານ, ນັກສຶກສາເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ, ສະຫາຍ ຮສ ພູວົງ ອຸ່ນຄໍາແສນ ໄດ້ລາຍງານໃຫ້ຮູ້ກ່ຽວກັບຜົນງານການເຄື່ອນໄຫວ ຕະຫຼອດໃນໄລຍະທີ່ຜ່ານມາ ເຊິ່ງຄະນະພັກ-ຄະນະນໍາ ສມປຊ ແລະ ພະນັກງານ, ຄູ-ອາຈານ ໄດ້ເປັນເຈົ້າການເຄື່ອນໄຫວເຮັດໜ້າທີ່ການເມືອງຂອງຕົນຢ່າງຕັ້ງໜ້າ ໂດຍສະເພາະແມ່ນການ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິຕົກລົງກອງປະຊຸມໃຫຍ່ ຄັ້ງທີ V ຂອງອົງຄະນະພັກ ສມປຊ

ໂດຍໄດ້ສ້າງແຜນການເຄື່ອນໄຫວສຶກສາ ອົບຮົມການເມືອງ-ແນວຄິດ; ບຳລຸງ, ກໍ່ສ້າງຖັນແຖວສະມາຊິກພັກ, ພະນັກງານ, ຄູອາຈານ ແລະ ນັກສຶກສາ ໃນແຕ່ລະໄລຍະຢ່າງຈະແຈ້ງ, ໄດ້ຖືສໍາຄັນວຽກງານຕິດຕາມ, ເກັບກໍາ ແລະ ແກ້ໄຂສະພາບການກໍຄືທ່າອ່ຽງ ການຜັນແປທາງດ້ານແນວຄິດ ຂອງຖັນແຖວສະມາຊິກພັກ, ພະນັກງານລັດຖະກອນ ແລະ ນັກສຶກສາຢ່າງທັນການ, ສ້າງລະບອບລາຍງານສ່ອງແສງ ແລະແຈ້ງຂ່າວພາຍໃນຢ່າງເປັນ ປົກກະຕິ.

ກົງຈັກການຈັດຕັ້ງຂອງສະຖາບັນ ໄດ້ສືບຕໍ່ປັບປຸງ ໃຫ້ມີຄວາມເຂັ້ມແຂງ, ສາມາດປະຕິບັດໜ້າທີ່ການເມືອງ ຢ່າງມີປະສິດທິຜົນ ອີງຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງເພີ່ມຂຶ້ນ, ໄດ້ສ້າງຕັ້ງ 02 ກົມເພີ່ມຕື່ມຄື: ສູນຄົ້ນຄວ້າແນວຄິດໄກສອນ ພົມວິຫານ ເເລະ ກົມກວດກາ; ສັບຊ້ອນຈາກ 48 ພະແນກ ຍັງເຫຼືອ 38 ພະແນກ, ຄະນະນໍາຂັ້ນສູງຂອງສະຖາບັນ ມີ 04 ສະຫາຍ, ຍິງ 02 ສະຫາຍ, ໃນນັ້ນໄດ້ຮັບການແຕ່ງຕັ້ງຈາກຂັ້ນເທິງ 02 ສະຫາຍ.

ສະຫາຍ ຮສ ພູວົງ ອຸ່ນຄໍາແສນ ຍັງໃຫ້ຮູ້ອີກວ່າ: ສະຖາບັນການເມືອງ ແລະ ການປົກຄອງແຫ່ງຊາດ ທີ່ຜ່ານມາໄດ້ດໍາເນີນໂຄງການຫຼັກສູດການຮຽນ-ການສອນ ທັງໝົດ 4 ລະບົບຮຽນຄື: ລະບົບຊັ້ນສູງເລັ່ງລັດ 5 ເດືອນ, ລະບົບອະນຸປະລິນຍາ 2 ປີ; ລະບົບປະລິນຍາຕີ 4 ປີ ແລະ ລະບົບປະລິນຍາໂທການເມືອງ-ການປົກຄອງ 2 ປີ. ນອກນັ້ນຍັງໄດ້ຄຸ້ມຄອງ ການຈັດຕັ້ງປະຕິບັດການຮຽນ-ການສອນ ໂຄງການຫຼັກສູດລະບົບຊັ້ນກາງ, ຊັ້ນອະນຸປະລິນຍາຂອງໂຮງຮຽນການເມືອງ ແລະ ການປົກຄອງທ້ອງຖິ່ນທົ່ວປະເທດ, ຄຸ້ມຄອງຫຼັກສູດຝຶກອົບຮົມທິດສະດີການເມືອງ-ການປົກຄອງ ໄລະຍະສັ້ນ 45 ວັນ ຂອງບັນດາກະຊວງ-ອົງການອ້ອມຂ້າງສູນກາງ.

ໄລຍະ ປີ 2020-2022 ສມປຊ ມີນັກສຶກສາທີ່ມາສຶກສາຄົ້ນຄວ້າ ໄລຍະຍາວທັງໝົດ 1,205 ສະຫາຍ, ຍິງ 299 ສະຫາຍ, ໃນນັ້ນ ໄດ້ສໍາເລັດ ການສຶກສາໃນ ສົກຮຽນ 2020-2021 ຈໍານວນ 674 ສະຫາຍ, ຍິງ 157 ສະຫາຍ ແລະ ຍັງສືບຕໍ່ຮຽນໃນສົກຮຽນ 2021- 2022 ຈໍານວນ 531 ສະຫາຍ, ຍິງ 144 ສະຫາຍ; ດໍາເນີນການຝຶກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ມື້ ຢູ່ບັນດາກະຊວງ-ອົງການອ້ອມຂ້າງສູນກາງ ສົກຮຽນ 2020-2021 ລວມມີ 12 ກະຊວງ-ອົງການອ້ອມຂ້າງສູນກາງ ທີ່ເປີດຝຶກອົບຮົມຫຼັກສູດດັ່ງກ່າວ ລວມມີຈໍານວນຜູ້ເຂົ້າຮ່ວມທັງໝົດ 1,323 ສະຫາຍ, ຍິງ 548 ສະຫາຍ; ດໍາເນີນການຝຶກອົບຮົມທິດສະດີຕາມຫົວຂໍ້ສະເພາະ ໃຫ້ເລຂາພັກເມືອງ, ຄະນະປະຈໍາພັກເມືອງໃນທົ່ວປະເທດ ໄລຍະສັ້ນ 10-15 ວັນ, ສົກຮຽນ 2020-2021 ລວມມີຜູ້ເຂົ້າຮ່ວມ 139 ສະຫາຍ, ຍິງ 14 ສະ ຫາຍ; ດໍາເນີນການຝຶກອົບຮົມທິດສະດີ ຕາມຫົວຂໍ້ສະເພາະ ຜູ້ບໍລິຫານລັດວິສາຫະກິດ ໄລຍະສັ້ນ 5 ວັນ, ໃນສົກຮຽນ 2020-2021 ມີຜູ້ເຂົ້າຮ່ວມ 117 ສະຫາຍ, ຍິງ 18 ສະຫາຍ.

ພ້ອມກັນນັ້ນ ສມປຊ ໄດ້ຊີ້ນໍາ ແລະ ຄຸ້ມຄອງດ້ານວິຊາການຕໍ່ໂຮງຮຽນການເມືອງ ແລະ ການປົກຄອງແຂວງທົ່ວປະເທດ ໄດ້ຈັດຕັ້ງປະຕິບັດຢູ່ 2 ລະບົບຄື: ລະບົບຊັ້ນກາງ ແລະ ລະບົບອະນຸປະລິນຍາ ມີນັກສຶກສາທັງໝົດ 3,303 ສະຫາຍ, ຍິງ 886 ສະຫາຍ ແລະ ໄດ້ມີຜົນສໍາເລັດຢ່າງຕັ້ງໜ້າໃນການພົວພັນຮ່ວມມືກັບຕ່າງປະເທດ ຕາມບົດບັນທຶກການຮ່ວມມື ໂດຍສະເພາະການຮ່ວມມືກັບເພື່ອນມິດຍຸດທະສາດສັງຄົມນິຍົມ ສສ ຫວຽດນາມ ແລະ ສປ ຈີນ ເຊິ່ງໄດ້ປະກອບສ່ວນຍົກສູງຄຸນະພາບການຮຽນ-ການສອນ, ການຄົ້ນຄວ້າວິທະຍາສາດ, ການບໍາລຸງ-ກໍ່ສ້າງ ພະນັກງານ, ຄູ-ອາຈານ ແລະ ຍາດແຍ່ງການຊ່ວຍເຫຼືອຕ່າງໆ ເຂົ້າສູ່ສະຖາບັນໄດ້ຢ່າງມີຜົນສໍາເລັດ.

ໂອກາດນີ້, ສະຫາຍ ເລຂາທິການໃຫຍ່ ໄດ້ໂອ້ລົມ ແລະ ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດຫຼາຍດ້ານ ທີ່ ສມປຊ ຍາດມາໄດ້ຕະຫຼອດໄລຍະທີ່ຜ່ານມາ ແລະ ເພື່ອຕອບສະໜອງ ກັບຄວາມຮຽກຮ້ອງຕ້ອງການກັບໜ້າທີ່ການເມືອງໃນໄລຍະໃໝ່, ສມປຊ ຕ້ອງຍົກສູງການນໍາພາຢ່າງຮອບດ້ານ ແລະ ການພັດທະນາຖັນແຖວພະນັກງານ, ຄູ-ອາຈານ, ເອົາໃຈໃສ່ສ້າງຖັນແຖວຄູ-ອາຈານ, ນັກວິທະຍາສາດ, ພະນັກງານບໍລິຫານ ໃຫ້ມີຄວາມຮູ້, ຄວາມສາມາດ, ມີທັດສະນະການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ໄດ້ຮັບການກໍ່ສ້າງທີ່ເປັນລະບົບ, ລົງເລິກທາງດ້ານທິດສະດີ, ມີວິທີວິທະຍາດ້ານການສິດສອນ.

ພ້ອມນັ້ນ, ສະຫາຍ ທອງລຸນ ສີສຸລິດ ຍັງໄດ້ເນັ້ນໃຫ້ສະຖາບັນ ຕ້ອງສູ້ຊົນສ້າງ ແລະ ພັດທະນາໃຫ້ກາຍເປັນສະຖາບັນທີ່ທັນສະໄໝ, ຮັກສາໄດ້ທາດແທ້ຂອງໂຮງຮຽນພັກ ແລະ ເຊື່ອມໂຍງກັບສາກົນ, ພັກ ແລະ ລັດຖະບານ ຍາມໃດກໍໃຫ້ຄວາມສໍາຄັນ ແລະ ໃຫ້ການລົງທຶນຢ່າງເໝາະສົມ ໃຫ້ແກ່ສະຖາບັນ ໃນການພັດທະນາພື້ນຖານໂຄງລ່າງ, ເຕັກນິກສ້າງໃຫ້ສະຖາບັນກາຍເປັນສູນກາງແຫ່ງການບໍາລຸງ, ກໍ່ສ້າງພະນັກງານ ທາງດ້ານທິດສະດີການເມືອງ-ການປົກຄອງ, ເປັນສູນກາງແຫ່ງການຄົ້ນຄວ້າທິດສະດີ ມາກ-ເລນິນ, ແນວຄິດໄກສອນ ພົມວິຫານ ເປັນຂົວຕໍ່ລະຫວ່າງລະບົບໂຮງຮຽນພັກ, ສູນບໍາລຸງພະນັກງານຢູ່ບັນດາກະຊວງ, ອົງການຕ່າງໆ. ສະຖາບັນ ຄວນເອົາໃຈໃສ່ວຽກງານເປີດກວ້າງຍົກສູງຄຸນະພາບ, ປະສິດທິຜົນການຮ່ວມມືສາກົນ, ຮັບເອົາບົດຮຽນທີ່ດີຈາກບັນດາປະເທດເພື່ອມິດ ໃນວຽກງານບໍາລຸງ-ກໍ່ສ້າງພະນັກງານ, ການຄົ້ນຄວ້າວິທະຍາສາດ ເປັນຕົ້ນແມ່ນວິທະຍາສາດການເມືອງ, ວິທະຍາສາດ ການນໍາພາ, ຄຸ້ມຄອງທີ່ກ້າວໜ້າ. ທັງນີ້ ເພື່ອເຮັດໃຫ້ສະຖາບັນ ເຮັດສໍາເລັດໜ້າທີ່ການເມືອງທີ່ພັກ, ລັດມອບໝາຍໃຫ້ປະກອບສ່ວນສໍາຄັນເຂົ້າໃນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກຢ່າງມີຜົນສໍາເລັດ.

ຂ່າວລາວ